2017年12月16日

旅程後備現金存放研究

旅程後備現金存放研究

又係眼睛想旅行時間。
之前示範過藥筒放錢範例(當時用得果定),但係其實唔係太有用,因為只能放好少既錢,因此只適合用黎放少量「最終救命錢」,唔足夠。
而我今次係示範另一個範例。請先搞清楚,我並唔係係度教大家「用某一件"指定既"物件」黎做呢件事;我一直想教導既, *係一套心法、一套思路* ;而唔係直接叫你「用乜野object」去做。



我今次用既係呢個眼鏡盒。事實上我用呢個並唔完美,只係用作表達"思路":我所希望既係,假如你地都覺得自己有相同需要 *(係旅途中,需要放一定比率既現金在行李(酒店),而唔會帶晒全部現金出街)* —— 有d人會認為冇呢種需要,我唔爭辯 —— 你地可以按照呢套心法、呢個思路、係你地手頭上,搵出適當既物件黎做。

假如只係單純「搵個地方塞到舊錢入去」既話,使撚講咁多咩;但依家要預防既唔係扒手,亦唔係打劫或者搶手袋,而係放係房間無人Attend既行李。可以係酒店員工、可以係爆你間房既賊。

其實個大原則同「得果定筒」並無分別:當一個賊能夠搵到機會巢你既行李時,佢仍然唔會注意你放錢既地方。
心法就係:要放係一個,即使個賊見到、摸到,佢都唔會諗你係放錢係入面。要當個賊見到時, *佢以為自己知道呢舊係乜野* ,而且對佢唔會有興趣、唔值得花時間去打開睇下佢。唔能夠令佢聯想到呢舊野入面會有值得去偷既貴重野。唔能夠令個賊感到好奇:放果舊野係果個地方,係「唔自然」既、顯得格格不入既。

舉幾個例。如果係你行李入面見到一個銀包,咁係賊都會去打開佢。如果佢見到有一個散紙包、或者係任何"general pocket",即係一個冇明顯用途既小袋,佢會好奇。例如你同我一樣有個放雜七雜八既旅行用品袋,但係入面寧寧叮叮有個信封,又或者無端端塞左個DVD盒係入面,係人係賊都會好奇。呢d就係「格格不入」。例如本來求其搵隻襪,塞堆現金入去包住,呢個idea唔錯;但係你偏偏就咁將「果一隻襪」(係,仲要得一隻)塞係一堆電線呀、叉電器呀、電池呀堆野入面,呢種就係格格不入。

因此其實我係本例裡面用既「呢個眼鏡盒」並唔算完美,因為佢既外觀可能會懷疑係名牌貴價眼鏡而會去打開望望。但係用黎表達我既思路已經足夠,因為事實上我可以用平凡、唔搶眼,卻又一望就知係「眼鏡盒/眼鏡套」,只係即時囉呢個黎示範。

我再重申一次。我 *唔係* 係度教你「用咩黎裝錢」,而係講述緊心法同思路。而各位假如認同呢個需求,應該按此而搵出自己身邊擁有而又適合、至少你自己覺得順手既物品。

唔講唔講還需講。講一d我認為適合作此用途既物件:
- 使立消鐵盒 (呢個真係近乎無敵,記住係鐵盒)
- 一包包既香口膠袋(個袋口有seal果種)
- 藥/急救用品盒,例如一個size剛好既藥水膠布紙盒,外觀一定要一睇就知係藥或者呢類用品
- (前面提過) 襪,要放返係其他襪呀底衫褲呀一齊
- (女人專屬) M巾 (要原裝品牌包裝一望即知係M巾,而唔係獨立既"M巾袋")
- 煙盒(零售紙盒,唔係講金屬煙盒)
- *唔‧好‧諗‧撚‧埋‧d「挖空本書放係裡面」之類on‧柒‧鳩‧弱‧撚‧智‧既‧古‧靈‧精‧怪‧做‧法* (好多台灣傻閪專門教人做埋呢亭低B野)
- ……你地應該能夠搵到任何你地自己手頭上已有、而又更適合既其他物件。

記住「心法」更重要。搵到乜野黎裝,囉黎放係個袋入面,自己對住佢幻想自己係做賊,見到摸到會點諗。

✩✩✩✩✩✩✩✩✩✩✩✩✩✩✩✩✩✩✩✩✩✩✩✩

最後離題講一件具體既產品: *折疊衣架* ,對旅行者黎講簡直係神物。最好同時擁有一條橡筋繩。

呢樣野我好耐之前係果d兩蚊店見過,以前覺得係典型大陸產垃圾。後來外遊時係外面先發現呢種衣架幾咁有用,卻已經完全唔見晒,最後要特登走去淘寶。他媽的買完返黎無耐,就發現忽然無論兩蚊店五蚊店定DAISO都湧晒出黎。
Yes,依家你去d濕鳩兩蚊店或者雜架攤都買得到,唔使淘寶。